Mi ta un señora kasá, mi nòmber ta Elba Mercera, nasé na Rincon, Bonaire, dia 25 di yüni 1955. Mi ta
kasá ku señor Silvio Mercera, i huntu nos tin un yu hòmber, Suradno Mercera, i dos nietunan: Sukela
Mercera i Sufarno Mercera.
For di mi hubentut mi tabata hopi aktivo den komunidat na Rincon. Mi a partisipá den diferente aktividatnan di iglesia, manera den koor di misa Santa Cecilia, den damesclub, den organisashon di Dia di Rincon, i tambe den diferente aktividatnan di karnaval. Ademas di mi trabou voluntario, mi a traha durante 17 aña na Cambes na Playa i 10 aña komo costurera di misa.
Na 1999 mi i mi famia a emigra pa Tilburg, Hulanda. Aya mi a sigui traha den sektor di produkshon pa un periodo di 15 aña, i despues mi a traha den sektor di limpiesa te ora mi a baha ku penshun.
Tambe na Hulanda mi a keda hopi aktivo den komunidat. Mi a sigui kanta den koor di misa, i mi mes a funda un damesclub. Ademas di esaki mi a hasi trabou voluntario na wijkcentrum i mi a kuminsá organisá misa pa atianonan tur luna. Den karnaval mi a baila den un grupo na Tilburg pa 20 aña largu, i despues mi a kuminsá organisá seú pa 10 aña.
Mi a keda semper ku e deseo pa sigui selebrá i mantené tradishon di Dia di Rincon tambe na
Hulanda. Despues mi a deskubrí ku señor Tico Balentien a organisá e aktividat un biaha na 2001 na Delft, pero despues el a stòp ku e organizashon.
Despues di buska un lugá adekuá, Gemeente Tilburg a referí mi na Bosvreugd. Na e lugá ey mi a kuminsá organisá Dia di Rincon na Tilburg. Ku hopi amor, dedikashon i forsa propio mi a logra mantené e evento pa 23 aña consecutivo.
Mi a organisá e evento pa promé biaha na 2003, i e aña aki mi ta e Embahadora di e evento. Durante tur e aña nan mi a logra sigui ku e aktividat sin subsidio, solamente ku mi propio esfuerso i sout di komunidat. Den e ultimo dos aña, Openbaar Lichaam Bonaire a kuminsá sponsor e evento ku un kontribushon.
Na 2005 mi a risibí un premio kultural komo rekonosementu pa mi trabou den komunidat. Na 2025 mi a ser ofisialmente rekonosí na Rincon pa Openbaar Lichaam Bonaire, komo apresiashon pa mi kontribushon na preservashon di kultura i tradishon di Rincon na Hulanda.
Den 2025, Naidy Cicilia a aserka mi ku e petishon pa por intervistá hende riba historia di Dia di
Rincon. Durante e proseso nos a sera i nos a bai tour den Rincon, pa e por mira su famianan, ya ku
ela a muda den su hubentut for di Bonaire pa Hulanda.
Su difuntu mama, ku tabata prima di mi kas, tabata konosí pa nos i semper el a bishitá Dia di Rincon
huntu ku su yunan na Rincon, Bonaire, i despues nan a sigui bishitá Dia di Rincon na Hulanda.